Moti i dhimbjes poezi nga E. Kaceli

Mos d'vet:
Ftoftë ka me bâ
a mjegull gri,
o ka me ra shi...
Mos d'vet:
Ç'erë e fortë
ka me fry!
Mos d'vdet:
Kur dielli ka me mrrî
Prit veç borën!
Prite giatë
Kohën mos rri tue matë...
Prite borën aty!
N'mos ardhtë bora
kam me ardhë un'
me u shkri n'ty!

Itali dhjetor 2024

Mirësevini në BabziLand! nga E. Kaceli, Itali

Për romanin "Brirët" të poetit dhe gazetarit të mirënjohur Marash Mirashi
-një roman që shënon histori në letërsinë bashkëkohore shqiptare e më gjërë!
 
Ju donit Republikën e Hashures! Marash Mirashi, ju sjell Republikën e Babzilandit! Mirë se vini në shtetin më të ri, e më grotesk në botë, që vetëm gjeniu i një shkrimtari (poet dhe gazetar, i mirënjohur) mund ta krijojë!

Emri zyrtar: Republika e Babzilandit
Emblema shtetërore: Dy brirë
Heroi Kombëtar: Urtmileti
Tipi i regjimit: Demokraci baritore
Kryeqyteti: Tirrvul
Organi ekzekutiv: Këshilli i Lartë i Barinjve
Posti më i lartë: Kryebari
Postet më të ulta: Bari ose bareshë
Monedha kombëtare: Babzinda
Numri i popullsisë: Në proces numërimi
Ndarja administrative: Katër kantone
Arma ceremoniale shtetërore: Sfurku
E adhurojnë shumë Kryebariun e tyre. Interesohen vazhdimisht për shëndetin e tij dhe gëzohen pa masë, kur ai del në televizor dhe mban fjalime fort monotone!

Mjafton kjo pashaportë për të ftuar lexuesin në historinë e asaj çka do të ndodhë më pas në romanin satiriko -grotesk "Brirët"!
Një kronologji e paralajmëruar dhe e jetuar prej 1944 e sot, në vendin ku nënshtrimi, mashtrimi, spiunllëku, diktatura, servilizmi, kurvëria, injoranca, arroganca, dhuna dhe babëzia janë shëndrrur në institucion deri në sferat më të larta!
 “Ky dreq pushteti - mendoi me vete, - kaq shumë i mbarsur me servilizëm, tule grash, korrupsion, babëzi dhe kurthe. Nuk i thonë kot Babziland!” Kur u kujtua se edhe ai vetë ishte njëri nga ata që i mbartte këto cilësi, e mbylli gojën."
Thënë kjo, unë nuk do të ndalem në hollësitë e romanit, në përshkrimin e personazheve, në vështrimin kritik apo në gabimet ortografike!

Në një kohë kur të gjithë janë bërë shkrimtarë, kritikë, poetë, gazetarë, analistë etj.. etj... unë thjeshtë do ju ftoja të fillonit leximin e kësaj perle të letërsisë bashkëkohore shqiptare dhe më gjërë). Ju ftoj të filloni leximin, me sigurinë se nuk do gaboni në përzgjedhjen tuaj!
Pse duhet të lexojmë "Brirët"? -Se është një roman satiriko -grotesk krejt ndryshe! Në paçi lexuar "Don Kishot", "Ushtari i mirë Shvejk", "Ferma e Kafshëve" apo satirën e të madhit Konica, Mirashi na sjell diçka krejt ndryshe, në një tjetër nivel!
Shkrimtari Marash Mirashi, në ndryshim, nëpërmjet një grotesku mjeshtëror, evidenton atë që regjimet diktatoriale dhe postdiktatoriale, autokratike, arrijnë të bëjnë me Njeriun! E kthejnë Njeriun në një kafshë, në rastin konkret në një lopë (tufë lopësh), duke ia rrëzuar dinjitetin njerëzor deri në shkallën më të ulët të zhvillimit biologjik!
Kthimi në lopë që pëllasin të gëzuara, ndërsa lëshohen nga Kryebariu të kullosin rrugëve dhe arave të Babzilandit, pavarësisht nga rangu që patën, sa ishin njerëz të pushtetshëm, është metamorfoza që nuk i shpëton dot!
Kohët e vështira kanë nevojë për letërsi të madhe! Romani "Brirët" i shkrimtarit Marash Mirashi, ka zënë vendin e vet dinjitoz në këtë letërsi! Lexojeni!
Edmond Kaceli, Itali

SPAK shpall NUL zgjedhjen e Trump! nga Italia E. Kaceli

Tiranë, Shqipëri, nëntor 2024: Sipas burimeve të Tiranës zyrtare, dhe sipas burimeve të sigurta pranë SPAK-ut shqiptar, ky i fundit pritet të shpallë të pavlefshme zgjedhjet e Presidentit të 47 -të në SHBA!

Lajmin e konfirmon edhe vetë Ambasada Amerikane nëpërmjet zëdhënësit të FBI-së në Tiranë, avokatit të nderuar Spartak Ngjela!
I pyetur gjatë një konference për shtyp, kreu i SPAK-ut, Prokurori i Akullt, Altin Dumani, tha se institucioni që ai përfaqëson, ka të gjitha të drejtat legjitime të hetojë (deri në anullim) zgjedhjet dhe politikanët e vendeve të tjera, pavarësisht se në cilën pjesë të globit jetojnë!
Sa i takon rastit konkret, pra anullimit të zgjedhjeve në USA, Dumani tha se "as nuk e pohon dhe as nuk e mohon që është hapur një dosje e tillë"

E drejta e SPKA-ut për të ndërhyrë në punët e Amerikës, rrjedh nga ligjet speciale që vetë Parlamenti Shqiptar, nën udhëheqjen e amerikanëve,  ka miratuar kohë më parë, dhe që miraton në vijim! Natyrisht rolin kryesor e ka Mbrojtësi i Zgjedhjeve të Lira e të Ndershme, zoti Edi Rama, që është edhe Kryetar i Qeverisë, mbështetur fortësisht nga administrata aktuale amerikane dhe një pjesë e nderuar e FBI-së!

Menjëherë ka plasur rrëmuja dhe çorientimi në Opozitën e Mirëorganizuar Shqiptare (MISH), që fitoren e Trump-it e quajti fundi i qeverisë së korruptuar të administratës Rama -Biden!
Nga dritarja e shtëpisë, Lideri i Opozitës, Sali Berisha deklaroi për të pranishmit poshtë ballkonit se " SPAK-u, kjo vegël e  Narko Qeverisë Shqiptare, kërkon të ndërhyjë padrejtësisht në punët e brendshme të Amerikës, mikes më të madhe të kombit shqiptar!" Berisha, i njohur për respektin e madh të kushtetutës dhe të zgjedhjeve të lira e të ndershme, tha se "Koburja SPAK në duart e Edi Dramës kërkon të vrasë demokracinë e brishtë amerikane!"

Për Kryetaren e parlamentit shqiptar shoqen e nderuar Eliza Spiropali "E drejta kushtetuese e anullimit të zgjedhjeve në USA e ka bazën në precedentin historik të Skënderbeut kur iku në Itali, Napoli, dhe me forcën ligjit vendosi drejtësi në favor të Ferdinandit të Napolit!"
Kryetarja e Parlamentit tha se Skënderbeu i Sajë ka të njëjtat të drejta kur bëhet fjalë për lirinë dhe prosperitetin e popullit vëlla amerikan!

Në përkrahje të Spakut dhe vendimit të tij për të quajtur Nul zgjedhjen e Donald Trump, diaspora e shokëve dhe shoqeve të Partisë Socialiste, në USA, ka filluar lobimin dhe së shpejti organizon protesta në zemër të Neë York-ut!
Vlen të theksohet se në mbështeje të SPAK-ut, ka dalë hapur edhe Baba Mondi në cilësinë e Kryetarit të Shtetit më te vogël Shqiptar në Ballkan e më gjërë.
 
nga Italia E. Kaceli

Pema e thame

M'duket veti
si ajo pema e thame,
lypëse,
            zhelake
e rrxueme
karshi rrugës
ku njerëz kalojnë indiferentë
e askush nuk ia hedh ì gjethe
                                                lmoshet
me mbulu dhimbjen!

Itali 2024

Kafen e përditshme falma sot! poezi nga E. Kaceli

Jam ulë në kafenenë e përditshme

Qysh prej lindjes në të njëtin ritual

Në të njëjtën kafene të trishtë

Me të njëjtën muzikë rrangallë

Nga një radio e vjetër sa shekulli

Çirret këngëtari im aspak i preferuar

karriget e brejtura nga koha

rreshtuar në një labirinth kurth

                                             pa dalje

Në kafenenë ku askush nuk më sheh

në kafenenë ku askush nuk më flet

Veç baristja me sy të trishtë

që tregojnë mungesën e seksit prej motesh

Unë gjerb me kujdes kafen...

Lëshoj një monedhë si lëmoshë

Një monedhë tjetër si bakshish

Në dalje,

marr në xhep trishtimin e baristes

I shtoj trishtimin tim

Largohem

Për tu kthyer prapë nesër

në të njëjtën orë

Me marrë filxhanin tim në dorë

ku pasqyrohen sytë e trishtë të baristes

E lutem: O Zot!

-kafen e përditshme falma sot!

 

Alba, It, tetor 2024

Misteri final vargje nga E. Kaceli

 
Zoti jem! -nuk e di, nuk e di!
kur të shihna ballë për ballë,
a ke me pasë guximin me m'kqyr n'sy?
Nuk e di, Zoti jem, në Misterin Final
Cilli prej nesh ka me dhanë llogari?

It. shtator 2024 

Fotografia e vjetër sonet nga E. Kaceli

 

Kam mbetur i rrudhur, pa ngjyra,
I tretur, bardhë e zi, i zbehtë, vrazhdët
Një fotografi e vjetër, gati shkatërruar
Dashuri e harruar, mykur në të lagësht.
 
Në kujtime të humbura, në kohë të shkuara,
Një hije e zbehtë, një ëndërr e largët,
Në sytë e mi, Botë Liga, e Shuara,
Dashuri e vjetër, e rrënuar, e plakët!
 
Në heshtje të thellë, të rremë, të ftohtë,
Një kujtim i thatë, një ndjenjë e humbur,
Një plagë e vjetër, s'më lë në qetësi

Në dritën e hënës, në thellësinë natë,
Një varrë e lashtë, një fjalë e gjakosur,
Thellohet përçast, n'shpirtnimin bardhë e zi!
 
Tetor 2024, Itali

Mëkatar poezi nga E. Kaceli

Kisha me dashtë, fort
kisha me mujtë me pasë dëshirë
me bâ të gjitha mëkatet që si bâna kurrë
qysh se leva, fmì, e der' sa u bana burrë
(O ç'fjalë e randë fjala burrë!)
Pra tash që mosha po ikë, si pa u ndì,
Kisha me dashtë me bâ mëkatet që s'bana
Falje mos me lypë për to
E me u bâ hì!

Edmond Kaceli, tetor, Itali 2024

Pamflet: Kryeministri nuk është budallë! Thjeshtë duhet t'i rregullojnë dorën dhe dozën e Hashures! nga E. Kaceli

Qef o qef, që bën dervishi
bukë, raki e thela mishi
(Kushtetuta e HashurRepublik neni nr.1)
-Krijimi i shtetit Bektashi, brenda Shqipërisë zyrtare, vërteton faktin se Toka është e sheshtë!
( Kushtetuta e HashurRepublik neni nr.2)

Italia, të vetmen luftë të vërtetë, pas humbjes së Luftës së II Botërore, e ka bërë kundër shtetit Ishulli i Trëndafilave, krijuar mbi një platformë detare, nga inxhinieri gjenial Giorgio Rosa, e shpallur shtet i pavarur nga Italia në maj të v.1968. Shteti italian ndërhyri me forca speciale dhe i vuri tritolin duke i dhënë fund kështu Republikës Esperantiste prej 400 m2!
Për dijeni të Spiropalit është edhe film "Isola delle Rose"!

Pra siç shihet krijimi i mikroshteteve, brenda shteteve, nuk është një gjë e re! Çdo budallë, ose budallë -gjeni, në secilin shtet të botës, mundet me u çua prej gjumit në mëngjez, e mundet me shpallë krijimin e një shteti në oborrin e shtëpisë së vet!

Në vijim mund të them se ideja për krijimin e një shteti Bektashi në kryqytetin shqiptar është shenjë hyjnore që Baba Tomorri ia shpalli në fillim Edi Ramës e më pas edhe Edmond Brahimaj, (ndryshe Baba Mondit) ndërsa konsumonin një tas me Hashure në Selinë e Kryegjyshatës!
Është hyjnore se iu shpall direkt Gjeniut të Politikës Shqiptare, Karburantit të Satelitëve, Mishëruesit të Skënderbeut, Ndezësit të Inceneratorëve, Krijuesit të Aeroporteve, Ndërtuesit të Urave të Çelikta, Liderit Botëror të Turzimit, Krijuesit të Ballkanit të Hapur... (Me krijimin e Bektashianit të Pavarur thjeshtë: Tash e tutje ndër heroizmat dhe tituj e shumtë onorifikues, i shtohet edhe: Krijues Shtetesh te Pavarura!)

Për të gjithë skeptikët dhe septikët, që kanë vjellë, e vijonë të vjellin, vrer kundër Gjeniut Global gjërat janë më të thjeshta se duken!

Kushtetuta: Kushtetuta nuk shkelet! I japim Baba Mondit, për territor, një nga kullat, psh atë buzë Xhamisë së Et'hem Beut në Tiranë! Ndërsa tokën e mbajmë për vete! Kushtetuta, mbi tërësinë territoriale, nuk shkelet! Republika është e sigurtë!
Çështja Kombëtare: Nuk ndikon negativisht, në Çështjen Kombëtare, fakti se shtojmë numrin e shtetve shqiptare në Ballkan! Ne, spjegon, Gjeniu Final, "rrisim prezencën tonë në OKB! Duke pasë kështu dy shtete brenda Shqipërisë! Në njërin shtet lëmë President kapterr Bajramin, në tjetrin automatikisht bëjmë President Kapterr Mondin!
Kryeministër të Përbashkët e të Përjetshëm lëmë Edi Ramën! Kryeparlamentare kemi Elizën, ministër financash ekstradojmë Ahmetajn, shëndetësinë ia lëmë Beqes...
A do të funksjonojë? Kështu iu mbyllet goja dhe të gjithë atyre që mendojnë se Republika e Hashures, ideuar nga Kryeministri Ynë i Lavdishëm, i Gjithëndritëshm, i Fortlumturueshëm, nuk do të funksionojë!

Po, do të funksionojë njëlloj si të gjitha mrekullitë gjeniale të firmosura prej Tij! Ura e Kukësit, Aeroporti i Kukësit, Aeroporti i Vlorës, Aeroporti i Divjakës, Aeroporti i Vermoshit, Akademia e Çobanëve, Satelitët, Inceneratorët, Anijet e Energjisë Detare, Ballkani i Hapur... e shumë e shumë mrekulli të tjera të realizuara në Epokën e Rilindjes!
Emri i Shetit: Ka pasë ide si Bektashistan, Bektashian, Mondian, Edramian etj. -E quajmë thjeshtë Republika e Hashures e mbyllet ky hesap!

Meqënëse jemi tek Hashurja, kam një lutje për Baba Mondin! Kur konsumoni Tasin me Hashure, bashkë me Gjeniun tonë të Gjithëndritshëm e të Përjetshëm, Mistikun e Math, thjeshtë rregullojani pak dorën dhe dozën hashures se latë nam!

Shënim: Kjo puna e mikroshtetve është, larg qoftë, sëmundje ndërkombëtare! Ja disa, më të spikaturat:
Sealand: Një mikronacion i ndërtuar në një platformë detare kundrejt brigjeve të Mbretërisë së Bashkuar. Është shpallur i pavarur në 1967. Ka pashaportën dhe monedhën e vet!
Principata e Hutt River -it: Në Australi. Është deklaruar e pavarur nga Leonard Casley në v.1970 pas një sherri me qeverinë australiane!
Republika e Molossia-s: Një mikroshtet i shtrirë në Nevada, USA, themeluar nga Kevin Baugh. Ka ligjet e veta, flamurin dhe valutën e vet!
Principata e Seborga-s: Në Liguria, Itali. Kjo është shpallur e tillë duke u bazuar në dokumenta historikë të periudhës Mesjetare! 
Liberland: Deklaruar në v.2015 nga Vít Jedlička, ndodhet në mes Kroacisë e Serbisë, në një pjesë toket pa zot! (E ne ankohemi për Nua Rrokun!)
Meqë doli fjala tek Zoti Toks Nua Rroku, në këtë drejtim edhe shqiptarët janë shquar për krijime të tilla fantastike:
Gjatë periudhës 1912 -1944 janë ndërtuar, gati, një qeveri shqiptare për numër banorësh! Dhe secila e quante veten shtet! Shteti i Vlorës, Shteti i Durrësit, Shteti i Tiranës, Shteti i Shijakut, me në krye Haxhi Qamilin, Republika e Mirditës...
Apo së fundmi edhe Principata e Libofshës, Fier, ideuar dhe mishëruar në figurën e Jarl Alexandre de Basseville që veç Alfred Cako mund të na ndriçojë lidhjen e tij me Shqipërinë!

Baba Tomorr, Kisha e Laçit, Sar Salltik: na mblidhë mendtë të gjithëve pa dallim feje, krahine apo ideje!

Helm... poezi nga E. Kaceli

Krijuar me IA nga Kaceli

Prej vitesh e pi nji kupë malli
Nji kupë -kristali mbushun idhnì
Nji kupë të idhët,
                             djegëse,
                                          helm
Kupë -mall -helmi
Fort larg vendit tim
Etshëm pi ditë e natë
langun vrastar
mshehun në kristalin e rrallë
në nji kohë pa fund, e krye
infinitivisht të gjatë
pi e nuk po din me u mbarua
aj mallkim -kupë -mallë
Mbytem n'helm!
N'helmin e mallit
Vdes ngadalë...

Itali, Shtator 2024